ГФК “Куманово“ на гости против “Аеродром 2018“

„Настапуваме со сосема нов состав, имаме неколку поискусни играчи и поголем број на играчи од младинската школа. Ако минатата сезона на секој натпревар игравме со голем притисок, оваа сезона ќе имаме помала напнатост, имаме поголемо искуство. Ветуваме дека на секој натпревар максимално ќе се бориме и ќе се трудиме да оствариме што поголем број на победи“, велат од ГФК Куманово.

Во клубот остануваат капитенот Горан Трајковски, голманот Андреј Јовановски, Богдан Велиновски, Перица Стојановски, Никола Стевчевски, Матеј Стојковски, Кристијан Златковски, Дарко Тодоровски.

Во тимот како засилување ова сезона ќе настапуваат Ергин Шерифи, Бехар Реџепи, Јетмир Љатифи, Кристијан Стаменковски, Боби Николовски и неколку играчи од младинската школа на клубот.

Тренер на клубот е Тони Раденковиќ, кој од почеток е во стручниот штаб на екипата. Пред нив се по 13 натпревари во есенскиот и пролетниот дел од прваенството, вкупно 26.

ГФК Куманово беше формиран кон крајот на 2022 година со спојување на три приватни клубови и тоа: ФК „Куманово 2012“, ФК „Еуроспорт“ и ФК „Студена Вода“. Во првата натпреварувачка сезона, минатата година во Трета лига- Север имаа максимален учинок, победија на сите натпревари и играа бараж натпревар за пласман во втората лига. Изгубија од тимот на „Победа“ од Прилеп и повторно се натпреваруваат во истата лига, како и лани.

Амбицијата за сезоната која претстои е да промовираат што поголем број на млади играчи, да создадат стабилен скелет на клубот. Сонот за повисок ранг на натпреварување не го забораваат, но планот е постабилно и посмирено, чекор по чекор да го изодат патот до таму.