Годинава најмалку пари за зимско одржување на улиците во Куманово, за првпат се вклучува и ЈП „Чистота и зеленило“

За разлика од оваа сезона, изминатите години буџетот за оваа намена изнесувал по 14 милиони денари (околу 228.000 евра), покажува извештајот на НВО Инфоцентар и партнерските организации кои спровеле мониторинг на зимското одржување на улиците и патиштата во 8 општини, меѓу кои и Куманово.

Според извештајот, од 2019 година зимското одржување на локалната патна мрежа му е доверено на економскиот оператор КООП Инжинеринг од Куманово,кој добивал околу 9 милиони денари или 146.000 евра, што во просек изнесува околу 75% од предвидените пари за чистење на снег и подмразица. ЈП„Чистота и зеленило“, пак, ги одржувало градските плоштади, тротоарите, пешачките патеки и другите јавни површини за што секоја година му следувале по 5 милиони денари (81.300 евра) од општинскиот буџет, предвиден во рамки на програмите за уредување на градежно земјиште, изградба и одржување на комуналната инфраструктура.

Но, од оваа 2023/2024 зимска сезона ЈП„Чистота и зеленило“ за првпат се вклучува и во чистењето на улиците и тоа во централното градско подрачје, односно во првата зона.

Приградските населби и селата и понатаму остануваат во надлежност на КООП Инжинеринг, кој пак поради намалениот обем на работа ќе добие и речиси двојно помалку пари, или 4,8 милиони денари (80.000 евра). Останатите средстсва се наменети за општинското претпријатие.

„Како што информира директорот, ЈП „Чистота и зеленило“ располага со најсовремена и специјализирана механизација, а за зимската сезона 2023/2024 ќе бидат ангажирани 8 возачи/машинисти и 60 вработени. Кон зимската служба се приклучуваат и сите работници задолжени за јавни површини, како метлари и работници за одржување зеленило. Нема да се ангажираат сезонски работници за одржување сообраќајници. Инаку, претпријатието склучува договор со општината за календарска година, а не за зимска сезона “, стои во извештајот за Куманово.

Во 2023 година, ЈП „Чистота и зеленило“ склучило договор со „МН Компани ДОО Гостивар“ за набавка на 120 тони индустриска сол, во вредност од 658.440 денари (10.700 евра). Досега се набавени 88 тони, а договорот се исполнува во зависност од реалните потреби.

Од Општина Куманово не доставиле податоци за реализацијата на договорите со економскиот оператор за периодот 2019-2023 година, односно за навистина извршените работи и исплатени средства за услугите за зимско одржување.

Мониторингот на зимското одржување во општините е реализиран во рамки на проектот „Активни граѓани и партиципативна демократија на локално ниво“, поддржан од Меѓународниот центар Улоф Палме од Шведска.