Голем интерес за вакцинирање против сезонски грип во Куманово

Од Центарот за јавно здравје во Куманово велат дека вчера дошле близу 100 граѓани, а денеска поради дождливото време нивниот број е помал, но сепак интересот е голем.

„Како и секоја година најголем е интересот на граѓаните од ризичните групи и повозрасните над 65 години. Оние што имаат навика редовно си доаѓаат и примаат вакцина“, - вели Јадранка Стаменковска, епидемиолог во Центарот за јавно здравје Куманово.

Оваа година Центарот набави 2000 дози на вакцини против сезонски грип. Вакцината е четиритипна и штити од четири типа на вирус, чини 650 денари.

Лекарите препорачуваат освен ризичните групи, а тоа се лица постари од 65 години, хронично болни, мали деца до пет години, здравствените работници, да се вакцинираат и на лицата кои се во контакт со многу лица.

Во Центарот за јавно здравје во Куманово од петок ќе започне и вакцинацијата со бесплатни вакцини, за пациентите коишто ќе добијат упат и термин од матичен лекар. За таа намена обезбедни се 1000 вакцини.