ИПА регион Куманово донираше пакетчиња за корисниците на Дневниот центар за лица со посебни потреби

Претставници на Комисијата за млади, спорт и култура: Гоце Николовски,претседател, Милош Спасиќ, координатор за спорт и Марија Петковска, координатор за млади се најзаслужни за спроведување на ова акција.

„Донацијата е набавена од парични средства соберени како добороволен прилог за време на одржувањето на годишното собрание на ИПА Регион Куманово на почетокот на ноември. Претходно, новогодишни пакетчиња беа донирани и на Општинската организација на Црвен крст Куманово“ истакна Гоце Николовски.

Комисијата на здружението за наредната 2024 година планира да одржи меѓународен, меморијален, шаховски турнир Мартин Петковски и уште една хуманитарна организација во соработка со Црвен крст, по повод 7 Мај- Денот на полицијата. Календарот е отворен и тоа нема да бидат единствени активности на новоформираниот орган на асоцијацијата.

Дневниот центар за лица со посебни потреби опслужува околу 20 корисници кои секојдневно го посетуваат, и се работи на нивна рехабилитација и ресоцијализација. Започнал со работа од 2005 на територија на Општина Куманово. Во центарот работат лиценцирани даватели на јавна услуга, но и центарот ги има потребните лиценци за згрижување на корисници. Тој е под ингеренција на Центарот за социјални работи од Куманово, а функционирањето се финансира од Министерството за труд и социјална политика.

„Секоја донација ни е добредојдена, со некои донатори имаме долгогодишно партнерство, сега почнуваме соработка со полициската асоцијација и се надевам дека и ова соработка ќе продолжи, на обострано задоволство. Ние секогаш сме отворени за соработка“, потенцираше дефектологот Сандра Крстевска- Саревска.

 ИПА Македонија е меѓународно полициско здружение во кое членуваат вработените во МВР, вработените во останатите безбедносни агенции кои произлегуваат од МВР, како и пензионирани и поранешни припадници од МВР. Регионалниот огранок Куманово брои преку 700 членови, а од неодамна е формирана и Комисија за млади, спорт и култура.