Изложба на цртежи од ликовниот камп “АСНОМ 2013“

На затварањето на кампот градоначалникот Зоран Дамјановски подели благодарници на 13 ученика кои твореа изминатите 4 дена.

Ќе се потрудиме наредната година да направиме интернационална ликовна колонија за млади со учесници од нашите збратимени градови ширум Балканот. Да го следиме примерот на интернационалните колонии како што се Карпино и Пелинце, бидејќи тука учествуваат многу значајни и признати уметници и повеќето се од Југоисточна Европа или Балкан.  - изјави Дамјановски.

Децата изработија уметнички дела во повеќе техники.

Се работеше во три подрачја и тоа дизајн, анимација, анимиран филм, групна работа, сликање на платно, графика техника монотипија. Се помина во најдобар ред, имаше убава атмосфера. Нашите ученици можат да кажат колку се задоволни и наредната година може да го направиме ова на државно ниво - вели Магда Величковска, професор по ликовно во ОУ“Вук Караџиќ“.

Учениците се задоволни затоа што имаа простор да ги покажат своите ликовни способности и да се дружат.

Прекрасно си поминавме. Кога ми кажаа дека ќе одам на ликовен камп, помислив дека тоа ќе биде нешто строго, цртање, но се испостави дека целта е запознавање и дружење со други деца. Сите работеа со акрилни бои, јас работев со пастели. Професорката ми рече дека поубаво цртам со пастели и го нацртав Џокер кој е мој омилен лик од цртаните серии - рече Александар Спасиќ, ученик од ОУ“Вук Караџиќ“.

Детскиот ликовен камп “АСНОМ 2013“ се оддржува трета година по ред под покровителство на градоначалникот и Советот на Општина Куманово, во организација на Фондацијата за спорт и култура.

Детските цртежи ќе бидат изложени На Ноемвриските денови, по повод денот на градот ќе се организира продажна изложба на детските цртежи, а собраните пари ќе се донираат за лицата со посебни потреби.