Зачленете се во нашиот клуб на читатели и најновите текстови ќе ги добивате на вашата мејл адреса
Оваа недела ќе започне реконструкцијата и училишната зграда на подрачното основно училиште „Карпош“ во кумановското село Љубодраг.
Проектот, предвидува реконструкција на покривот, подовите и тоалетите, замена на прозорците и вратите, како и изградба на нов систем за парно греење на пелети. Објектот ќе добие и енергетски ефикасна фасада, нова водоводна инсталација, но и адаптација на санитарните јазли и пристапни рампи за ученици со попреченост.
„Со реконструкцијата се очекува да се создадат условите за поквалитетна настава на учениците и за работа на наставниците. Покрај реконструкцијата на објекто ќе се инвестира и во нов инвентар, нови клупи, столчиња, табли“, изјави директорката Тања Тодоровска.
Во ова подрачно училиште учат 36 ученици во четири паралелки од прво до петто одделение, со тоа што во комбинирана паралелка учат четврто и петто одделение. Од шесто до деветто одделение овие ученици ја следат наставата во централното основно училиште „Карпош“ во село Умин Дол, каде што реконструкцијата на училишната зграда е во завршна фаза.
Реконструкцијата со адаптација на подрачното училиште во село Љубодраг ќе се реализира во рамките на проектот „Реконструкција на училишни објекти на основни и средни училишта“, со поддршка на Министерството за образование и Општина Куманово. Градежните работи треба да завршат за четири месеци
Ова е прва темелна реконструкција од кога е изградено училиштето од средината на 70-тите години на минатиот век.