Кривични пријави за 17 лица инволвирани во нападот кај „Орта бунар“

Станува збор за случајот во кој Б.Ш. (20) од Куманово пријавил дека на ул. „Карл Маркс“, додека бил во своето возило „фолксваген голф“, неколку лица  со тврди предмети му го оштетиле возилото. Во јавноста се појави видео снимка на која се гледа како 10-тина лица трчаат по улицата кај м.в. „Орта бунар“, каде што се случил нападот.

Против 10 пријавени,  надлежен јавен обвинител веќе поведе постапка за кривично дело – насилство, од член 386, став 2,  од Кривичниот законик.

До судијата на претходна постапка од Основниот суд Куманово за нив е поднесен предлог за определување мерки за претпазливост – забрана за напуштање на живеалиште, привремено одземање на патната или друга исправа за преминување на државната граница и обврска за повремено да се јавуваат во суд.

За останатите пријавени, меѓу кои има и малолетни лица, одлуката за натамошниот тек на постапката ќе биде донесена допрва.​