Куманово ќе додели 300.000 денари помош на збратимениот Драч

Предлогот беше поддржан од советниците на власта и на опозицијата, кои изразија сочувство на семејствата на настраданите. Одвоените средства се од буџетот на Советот.

Претседателката Атина Мургашанска, рече дека хуманоста не познава граници, а Куманово како традиционално докажана солидарна општина со висок степен на свест на нејзините жители, независно од верската, етничката и партиската припадност секогаш меѓу првите реагира и се огласува на повиците за помош.

„Кога се работи за збратимена општина со која имаме традиционално добри односи и добра соработка имавме уште поголем мотив да помогнеме и да ја ублажиме болката на нашите пријатели. Свикавме вонредна седница на која едногласно ја изгласавме одлуката за доделување на извесни средства, кои ќе се искористат за набавка на хигиенски и други неопходни средства за потребите на настраданите во земјотресот“, - изјави Мургашанска.

Советникот од ДУИ Фериз Дервиши, истакна дека Куманово има традиција да помага кога е најтешко и да се мобилизира да помогне, независно од етничката и верска припадност.

„Сакам да упатам благодарност до советниците, но и до сите граѓани кои преземаа иницијатива и се организираа во собирање на помош и парични средства за настраданите, за да се излезе во пресрет на граѓаните кои поминуваа низ еден исклучително тежок период предизвикан од земјотресот во Албанија“, - изјави Дервиши.

 Дел од советниците реагираа дека износот од 5.000 евра е незначителен, на што претседателката објасни дека и во други случаи се одвојувале исти средства, кои се од буџетот на Советот, а не од Општината.   

Таа  нагласи дека ова е прва помош што не значи дека во наредниот период нема да се издвојат дополнителни средства за таа намена.