Липково гради водовод на диво

Надлежните од Водостопанство „Кумановско-липковско поле„ кои стопанисуваат со акумулациите Липково и Глажња се противат на ваквата одлука, бидејќи сметаат дека со тоа ќе се загрози снабдувањето со вода на општината Куманово и наводнувањето на земјоделското земјиште.

Куманово зема вода од долната акумулација Липково околу 220 л/сек. Ако општината Липково се приклучи на Глажња и извлече 200 л/сек, тогаш долната брана Липково, која е помала ќе остане без вода.

Општината Липково во 2000 година добила одобрение од Министерството за земјоделство за изградба на водовод на езерото Липково од каде требало да добива 25 л/сек. вода за пиење. Наместо по добиениот проeкт, минатата година градоначалникот Садула Дураку започнал да гради цевковод во должина од 5 километри кон Глажња за 10 пати поголем капацитет.

Водостопанство треба да знае дека во општината Липково се наоѓаат двете брани и жителите на Општината треба да пијат од таа вода. Затоа Водостопанство не може да се однесува како господар, бидејќи и ние живееме во Република Македонија, а жителите имаат градоначалник кој се грижи за нив- изјави градоначалникот Дураку.

Од Водостопанство не се противат Липково да добие вода, но велат дека тоа треба да се направи под услови и критериуми согласно правилници и законски регулативи кои важат во Република Македонија.

Ние ќе сториме се да не дојде до нарушување на движењето на водите, уништување на водостопанска инфраструктура и системот за наводнување и да ги снабдиме жителите на Липково и Куманово со вода за пиење. Согласно законот управувањето со водите е под државна контрола за да не дојде до испуштање на водите за производство на електрична енергија, бидејќи таа мора да се чува за пиење, за земјоделските површини и индустријата - вели директорот на Водостопанство Филип Филиповски.

Познавачи на приликите велат дека решението на проблемот е изградениот цевковод кон Глажња да се даде на стопанисување на Водостопанство, кое понатаму ќе упаравува со водата за двете општини. Сите други решенија само ќе направат допонителни проблем и кавга меѓу општините во однос на водоснабдувањето.