Луна паркот кај спортската сала ќе остане до 1 март, потоа се сели на друго место

Забавниот парк пристигна на почетокот на месецот и го зазеде паркинг-просторот, но неговото отворање било одложено поради одржувањето на Купот во кошарка. Синоќа паркот беше осветлен и подготвен за почеток со работа.

„Согласно Програмата за поставување урбана опрема, издадена е дозвола за работа за периодот од 17 февруари до 1 март, на паркингот кај градскиот базен. Станува збор за времено решение, додека не се создадат услови за префрлање на посоодветно место. Изработен е елаборат, целата опрема и реквизити поседуваат сертификати за исправност, а склучен е и договор со ЈП ‘Чистота и зеленило’ за одржување на јавната чистота“, велат од Општина Куманово.

Фирмата ги намирила и своите финансиски обврски – надомест за користење градежно земјиште и за вршење дејност, односно комунална такса.

Неофицијално, новата локација на која се планира поставување на забавниот парк е просторот зад спортската сала, кој во меѓувреме треба да се уреди и приспособи за новата намена.

Дел од граѓаните што живеат во околните згради реагираат дека луна паркот создава бучава и дека е узурпиран паркинг-просторот, со кој Куманово и онака се соочува со недостиг. Сепак, поголем дел сметаат дека е добро градот да добие нова содржина за забава на најмладите.

Луна паркот е во сопственост на фирма од Србија. Претходно бил поставен во скопската населба Аеродром, од каде што бил отстранет поради немање дозвола за работа.