Младите од ГРОМ однесоа помош на семејството Стојковски

Тие поразговараа со членовите на ова сиромашно семејство кои се пожалија дека дрвата за огрев им се при крај, а со социјалната помош од 2000 денари не можат да купат ниту еден кубик дрва.

Откако прочитавме на вашиот портал за седумчленото семејство решивме да се организираме и да помогнеме. Дониравме алишта, храна, леб, млеко, зејтин, се што е потребно за ова семејство да ја помине зимата. Направивме муабет и заклучивме дека им се потребни уште работи како дрва за огрев, парични средства и ќе се потрудиме во наредниот период да обезбедиме што е можно повеќе - изјави Сања Трифуновска, претседател на Форум на млади на ГРОМ за Куманово.

Игор откако во медиумите побара помош од хуманите луѓе, неколкумина му се јавиле и ветиле помош, но членовите на ГРОМ се први кои ги посетија Стојковски.

 Од Валандово ми се јави човек и кажа дека ќе прати пратка преку пошта. Дојдоа од Црвен Крст Куманово, а Центарот за социјални работи ми пушти еднократна парична помош. Јас многу им се заблагодарувам на ГРОМ што во оваа прилика, на ваков убав празничен ден дојдоа да ме посетат - рече Стојковски.

Тој апелира до сите сограѓани доколку можат да му помогнат со работен ангажман или на друг начин да му излезат во пресрет.

35- годишниот Игор е невработен, а неговата сопруга Марина Алексиќ (27) е болна од епилепсија. Тие имаат пет деца од кои најголемото има 10 години, а најмалото 6 месеци.