Нарачани се 2.500 бесплатни вакцини против сезонски грип за жителите на Куманово

Нарачани се 2.500 бесплатни 4-валентни вакцини, наменети за ризичните групи и 200 комерцијални, за лицата кои не спаѓаат во ниедна ризична категорија, но имаат потреба да ја примат. Се уште не е познато колку ќе чини комерцијалната вакцина.

„Најправилно е пациентите самостојно да се пријават за вакцинација, преку страницата vakcinacija.mk -пријава за вакцинација за сезонски грип 2024. Многу е покомфорно и посигурно да го користат овој метод. Помладите членови од семејството тоа можат да го сторат наместо нив, а подоцна на мобилен ќе добијат порака со точен термин, датум и време кога можат да ја примат. Веќе е позната процедурата и за нас, медицинскиот кадар, но и за пациентите“, истакна д-р Јадранка Стаменковска, епидемиолог од ЦЈЗ.

Минатата година вакцинацијата започнала од 25 октомври, но процедурата се спроведувала и во ноември и декември. Во последните три месеци од 2023 година 2.348 лица ја примиле бесплатната вакцина, и 141 комерцијалната вакцина. Лекарите тврдат дека пикот на грип и заболувања слични на грип е во втората половина на јануари и февруари, па не е доцна да се прими вакцината пред новогодишните празници.

Вакцинацијата е бесплатна за ризичните групи меѓу кои стари лица (над 65 години), лица со хронични заболувања, здравствени работници, бремени жени и деца на возраст од 6 месеци до 5 години како и лица сместени во установи за социјална заштита на стари лица и вработените во тие установи. Вакцинацијата против сезонски грип е најефикасна мерка за превенција од вирусот , која спречува појава на потешки форми, компликации и смртен исход, особено кај ризичните групи.

Според календарот на Институтот за јавно здравје во 40-та недела од годината се започнува со следење на вирусните заболувања- посебно за грипот. Во Куманово до сега нема пријавени случаи, а во првата недела од месецот на ниво на државата пријавени се 25 случаи на грип или заболувања слични на грип.