Не вршиме селективен отпис на долгови за комунална такса и фирмарина, тврди Општина Куманово

Одлуката за отпис на побарувања по основ на комунална такса за фирма, односно назив на деловна просторија заклучно со 2018 годинa и данок на имот за правни и физички лица заклучно со 2012 година беше изгласана од Советот на Општина Куманово. Со оваа одлука, поради апсолутна застареност по член 84, 85 и 85-а од Законот за даноци на имот и член 552-а, 552- б и 477 од Законот за трговски друштва, а се однесува на комуналната такса се изврши траен отпис на даноци и такси во износ од 77.917.805 денари.

„Општина Куманово, конкретно Сектор за даноци и такси ги има превземено сите законски дејствија за да ги наплати побарувањата почнувајќи од решенија, опомени за истите, решенија за блокади на домашна адреса и крајно решенија за присилна наплата во банки. Бидејќи се исцрпени сите законски, правни рамки и можности за наплата, а субјектите се избришани во Централен регистар и не постојат, побарувањата се нереални, односно фиктивни, Општината, односно Советот на Општина Куманово ја донесе оваа Одлука со 22 гласа за, 1 против и 3 воздржани. Не постои селективен пристап како што наведуваат во соопштението на Левица, едноставно станува збор за побарувања кои се ненаплатливи, а се водат во сметководствената евиденција, истите се апсолутно застарени и со нив се доведува во прашање и самата реализација на буџетот, така што нивниот отпис е неопходен. Општина Куманово работи законски, транспарентно, неселективно и е отворена за сите подеднакво и рамномерно“, се вели во соопштението на Општина Куманово.