Нема интерес за војни станови во Куманово

На огласот на Министерството за одбрана што завршил пред два дена, најголемиот дел од апликациите за станови се во Скопје во касарната Илинден, а за останатите градови речиси и да нема.

Можам да кажам дека најголем дел од заинтересираните се однесува за Скопје, додека за останатите градови е маргинален интересот. Што значи дека во останатите градови ние повторно ќе објавиме оглас, а во меѓувреме ќе оствариме непосредни контакти за да се испитаат други модалитети и решенија, зависно од тоа што се потребите и интересите за останатите градови во Македовија каде што армијата има свои структури, војници и старешини кои се заинтересирани за овој проект- рече министерот Фатмир Бесини, при денешната посета на касарната „Боро Менков„ во Куманово.

Според министерот, причината за слабиот интерес е од економски аспект, бидејќи цената на становите во проектот е иста на територијата на целата држава. На офицерите во внатрешноста не им се исплаќа да купуваат станови кои се поскапи, ако пазарната вредност во нивниот град е значително пониска.

Во Скопје цените на становите се прилично високи, и разликата во цената што се нуди со овој проект, наспроти пазарната цена во Скопје е најголема. Тоа е вистината, ако гледаме од аспект на стандардот, иста плата земаат војниците и во Скопје и во останатите градови, така да на пазарот тие можат приватно, надвор од проектот, да најдат по поволни цени за решавање на станбеното прашање- вели министерот.