Нови 6,5 километри гасоводна мрежа ќе се градат во Куманово

Средствата се обезбедени од вториот повик од унгарскиот кредит, а во тек е постапка за избор на изведувач. Градежните работи се очекува да започнат напролет.

Со проектот е предвидена гасификација на улиците „Драган Стопаревиќ“, „АВНОЈ“, „Народна револуција“, „Никола Тесла“, „Доне Божинов“ до влезот на населбата „Карпош“, дел од „Тоде Думба“, „11 Ноември“, кај училиштето „Толи Зордумис“, како и на улиците „Вараждинска“ и „Горњомилановачка“.

„Тоа за нас ќе значи нови приклучоци и стабилизирање на финансиската состојба на претпријатието, но истовремено и почиста животна средина и намалување на загадувањето на воздухот во Куманово“, изјави Марко Митровски, директор на ЈП „Куманово-гас“.

Минатото лето заврши изградбата на дистрибутивна гасоводна мрежа во должина од 2,5 километри, на потегот од дел од улицата „Видео Смилевски Бато“ до селото Доброшане, како и во Индустриската зона Доброшане.

„Проектот имаше за цел проширување на гасоводната инфраструктура и овозможување пристап до природен гас за деловните субјекти и потенцијалните инвеститори во индустриската зона. Со изградбата на секундарната мрежа се создадоа услови за поекономично, енергетски поефикасно и еколошки одржливо снабдување со енергија“, информираат од Владата.

Инвестицијата за овој проект изнесуваше 10.893.656 денари.