Се бара координирана акција од надлежните за заштита од пожари, најкритични точки Стари Лозја и Бавчи

Во последниот период, речиси и да нема ден кога нема по неколку пожари на јавни површини, а како најкритични точки се населбите  Стари Лозја и Бавчи.

Состанокот се одржал во Општина Куманово на иницијатива на градоначалникот Максим Димитриевски, а присуствувале претставници од Општината, СВР Куманово,  Територијалната противпожарна единица (ТППЕ),  Основно јавно обвинителство (ОЈО), Регионален центар за управување со кризи (РЦУК) и Дирекција за заштита и спасување (ДСЗ).
 
На состанокот било договорено да се изготви оперативен план од страна на надлежните институции, за детектирање на предизвиците, намалување на бројот на пожарите, навремено дејствување и пронаоѓање на сторителите.

„На состанокот беа донесени следниве заклучоци: заедничко делување на тимовите од Комуналната инспекција, СВР Куманово и членови на Советот на Општина Куманово, кои ќе ги посетат критичните делови на градот и ќе делуваат превентивно со локалното население. ТППЕ Куманово да обезбеди мобилна опрема за гасење на пожари (напртњачи и челични метли) и да ги стави на располагање на СВР Куманово, како би можеле дополнително со оваа опрема да ги задолжат своите тимови и при воочувања на овие пожари да бидат во можност да делуваат“, велат од  Општина Куманово.

 Во понеделник ќе се одржи состанок на Општински штаб за заштита и спасување кој ќе даде насоки за конкретно делување во следниот летен период, каде што, поради високите температури постои можност за појава на голем број пожари на територија на општина Куманово и регионот.

„ЈП „Чистота и зеленило“ ќе отпочне со интензивни активности за расчистување на диви депонии во градот, каде постои ризик од пожари. Во тек на наредна недела да се одржи состанок помеѓу општина Куманово, СВР Куманово и сопственици на мотокултиватори, како создавачи на диви депонии, со цел да се спречи оваа појава“, се додава во соопштението.