Откриен 130 килограми марихуана на Табановце, вредна 700.000 евра

Основното јавно обвинителство (ОЈО) Куманово донесе Наредба за спроведување истражна постапка против српски државјанин осомничен за кривично дело – Неовластено производство и пуштање во промет наркотични дроги, психотропни супстанции и прекурсори.

„На 29 октомври, на граничниот премин Табановце, во камион со полуприколка (ладилник) со словенечки регистарски ознаки, тој се обидел да пренесе 129,7 килограми наркотична дрога марихуана. Дрогата, во 14 торби скриени во камионот во сопственост на превозна компанија од Словенија, ги пронашле царинските службеници при контрола на возилото“, соопшти ОЈО.

Јавниот обвинител до судијата на претходна постапка од Основниот суд во Куманово достави предлог за определување мерка притвор за осомничениот.

Царинската управа, соопшти дека спречила меѓународен канал на нелегална трговија со 130 килограми опојна дрога марихуана, чија пазарна вредност надминува 700.000 евра.