„Перо Наков“ со награди на „Образовно рандеву“

Ученикот Дарко Димитриевски освои прво место за интервју за работа, а  екипно училиштето освои второ место за модна ревија и штанд, и трето место за маркетинг план. Учесниците на рандевуто, велат дека и покрај силната конкуренција оставиле впечаток, за што сведочат и наградите.

Учениците се натпреваруваа во повеќе од 20 категории. Има силна конкуренција, учествуваат училишта од цела Македонија, но не можеме да не бидеме задоволни од успехот на нашите ученици - вели Гордана Стојановска, наставник по економски предмети.

Првонаградениот Дарко Димитриевски подготвил кратка биографија, мотивационо писмо, препораки за вработување, и одговорил на сите прашања од комисијата на интервјуто за работа.

Беа во конкуренција 24 кандидати и одговаравме пред комисија која не прашуваше за работите наведено во цв-то. Ги подготвив сите документи и интервјуто се одвиваше на најдобар можен начин. Се одеше како што планиравме. Имаше некои ненадејни прашања, за кои требаше малку да се размисли, но одговорите одеа континуирано - рече Димитриевски.

Ученичката Милица Величковиќ објаснува дека сами подготвиле модна ревија со десет модели, инспирирани од историската облека и современата мода за што добија втора награда.

На штанд во Велес средношколците го презентирале своето училиште и профилите кои ги нуди.

Направивме макета, промотивен материјал, имаше флаери и летоци, бидејќи сите не го знаат нашето училиште. Можеше да се прочита историјата на нашето училиште и струките - вели ученичката Драгана Славевска.

Пет члена екипа подготви маркетинг план за производство на магарешко млеко и млечни производи.

Многу од луѓето не се запознаени со нашиот производ бидејќи е многу редок. Станува збор за исклучително квалитен производ. За таа цел подготвивме маркетинг план, отидовме и го презентиравме - рече ученикот Дарко Живковски.

Покрај медали и плакети, учениците за трето место за најдобар маркетинг план добија ваучер од 500 евра за запишување во бизнис академија во Скопје.