Платина и две бронзи за кумановските вина „Томино“ на Саемот во Белград

Во конкуренција од 600 излагачи од регионот и Европа, вината „Томино“ со македонско географско потекло од кумановскиот вински регион ја освоија публиката и стручната комисија, и се закитија со медали за квалитет – платина за белото вино шардоне и бронзени медали за црвените вина каберне и мерло.

Сопственикот Томислав Трајковски вели дека наградите се уште една потврда за квалитетот и меѓународното признание на нивните вина.

„Ова беше многу пријатно изненадување и за мене. Најискрено, не очекував дека ќе освоиме толку високо признание за белото вино. Да се добие платина во конкуренција на големи винарии со децениска традиција е голем успех, на кој сум неизмерно горд. Тоа покажува дека и малите винарии постигнуваат врвни резултати. Ние ја освоивме највисоката награда во Македонија за бело вино,“ вели Трајковски.

Белото вино шардоне е прозводство на Томислав и енологот Елена Богева.

На саемот во Белград учествувале околу 80 излагачи од Македонија, а само две винарии биле од Куманово. Штандот на „Томино“ бил посетен од голем број љубители на вино.

Винаријата во моментот е насочена кон освојување на европските пазари, а веќе се воспоставени контакти со Австрија. Во однос на минатата година го зголемиле производството и откупот на грозје.

Семејната винарија „Томино“ има сопствено производство на винско грозје од француските сорти мерло, каберне и шардоне, а по потреба откупува и темјаника од други македонски производители. Насадите се наоѓаат во селото Табановце, кое заедно со селата Четирце, Никуљане, Старо и Младо Нагоричане, се смета за исклучително квалитетно подрачје во кумановското виногорје.

Трајковски ја продолжил традицијата на своите предци, кои имале големи лозја во Банево Трло и Младо Нагоричане и произведувале познато вино и ракија. На местото на старите лозја, внукот засадил нови насади и го осовременил и проширил процесот на производство.

Во иднина, планира да ги прошири капацитетите на винова лоза, да изгради вински подрум и угостителски објект за дегустација во Табановце, кој ќе стане дел од македонската винска карта.