Поради пониските цени, граѓаните од соседството точат дизел во пограничните општини, вели Мицкоски

Тој додаде дека и покрај поскапувањата, цените на дизелот и бензинот во земјава се најниски во споредба со земјите од регионот.

„Кај нас дизелот чини 1,39 евра за литар. Во соседна Албанија цената е 1,79 евра, односно околу 30 проценти поскапо. Во Србија е 1,73 евра, што е околу 25 проценти поскапо, додека во Косово цената достигнува 1,52–1,53 евра, односно околу 15 проценти повеќе. Во Грција дизелот е 1,59 евра, а во Бугарија 1,41 евро. Во моментов имаме најниска цена на дизел горивото во регионот, а слична е состојбата и со бензинот од 95 и 98 октани“, изјави премиерот.

Тој посочи дека се очекува притисокот да продолжи и во наредниот период, но увери дека има доволно количини гориво.

„Разговараме со дистрибутерите и со компаниите кои ги снабдуваат граѓаните и македонската економија со нафта и нафтени деривати. Во моментов нема опасност од каков било недостаток“, додаде Мицкоски.

Премиерот најави дека утре ќе има состаноци со претставници на синџирите на супермаркети и хипермаркети, со цел да не се злоупотреби актуелната состојба и веднаш да се зголемат цените на производите.