Полуподземните контејнери ги дадоа очекуваните резултати

Наместо расфрлано ѓубре од преполнетите контејнери, кое дополнително го разнесуваа собирачите на пластика, животните, но и работниците кои ги празнеа контејнерите, сега сликата е сосема поинаква.  

„Просто не ми се верува дека може да биде вака чисто. По поставувањето на контејнерите дојде екипа на јавното претприијатие и го исчисти поширокиот простор. Секоја пофалба за ваквото решение. Да се надеваме дека вака ќе остане и нема да се уништи “, велат граѓаните од околните згради.

Тие сметаат дека ЈП „Чистота и зеленило“ мора да најде решение за собирање на кабаст отпад барем еднаш во неделата, а цената на услугата да ja вкалкулира со минимален износ во сметките, за да не се остава мебел покрај контејнерите и да се создаваат диви депонии.

 Од пред еден месец 15 подземни контејнери се поставени кај Економскoто училиште, поранешен ЗИК, Противпожарната станица, локалитетот Табакана, поранешен Вартекс, на Октомвриска револуција зад Мај маркет и ординација Ѓоше, а предходно и во централното градско подрачје.

Бенифитите од користењето на контејнерите се повеќекратни за граѓаните и јавното претпријатие, затоа што се собира поголема количина, изнесувањето на сметот се врши само еднаш дневно, со тоа се намалуваат трошоците, а не се создава метеж во сообраќајот.