Зачленете се во нашиот клуб на читатели и најновите текстови ќе ги добивате на вашата мејл адреса
Теодора.Ц (15) и Ана.С. (15), кои вчера беа прегазени на раскрсницата на булеварите „Трета МУБ„ и „Октомвриска револуција„ се ученички во основното училиште „Толи Зордумис„ во Куманово.
Двете девојчиња вчера попладне тргнале да се шетаат на Градскиот кеј кога се случила несреќата.
Сите сме во шок и потресени од немилиот настан. Двете другарки се осмооделенки и одлични ученички. Од сабајле ги откажавме сите активности во училиштето, потиштени сме и во исчекување како ќе се развива нивната здравствена состојба. Тешко повредената Теодора ја прогласивме за ученик на генерација и деновиве требаше да учествува на завршната приредба. Тоа се деца кои само може да посакате да учат во вашето училиште- вели Бобан Георѓиевски, директорот на училиштето.
Како што денеска соопшти полицијата, до сообраќајката дошло кога автомобил бмв со кој управувал Б.М.(25) од Куманово со голема брзина се движел од периферијата кон центарот на градот и пред крстосницата изгубил контрола на возилото и удрил во бетонска жардиниера, а потоа удрил во возило рено кое стоело пред семафорот. Од ударот, реното управувано од И.Н. удрило во друго возило кое се наоѓало пред него, а потоа излетало на десната страна на коловозот и ги прегазило девојчињата кои стоеле на тротоарот. Со повреди на главата се здобил и шоферот на реното И.Н.
Повредените се пренесени во Кумановската болница и по укажана лекарска помош девојчињата итно се префрлени на клиниките во Скопје.
Кумановската полиција работи на откривање на причините за несреќата.
Зачленете се во нашиот клуб на читатели и најновите текстови ќе ги добивате на вашата мејл адреса
