Промовиран романот „Рогот на љубовта“ во Куманово

Книгата ја доби наградата Стале Попов од Друштвото на писатели на Македонија. Павловски вели дека се работи за автобиографски роман, а дејството се одвива во средината на минатиот век.

Станува збор за нашите големи транзиции и за еден невиден ентузијазам на младите луѓе, кои во тој период пројавуваат интерес за сопствено издигнување и го почнуваат оној период на големо раслојување, заминување во туѓина. Меѓу романите што сум ги создал , 18 на број, веројатно овој е роман што најмногу го сакам. Го откинав во моето детство и го работев долго“- рече авторот.

“Рогот на љубовта„ наиде на позитивни критики во јавноста. Промоторот Блаже Миневски рече дека Павловски е класик, кој последните 50 години е фокусиран на пишување романи. Овој роман го третира нашето поблиско и подалечно минато.

Станува збор за приказна на оттуѓување на луѓето, на репресија од власта во 50 - те години на минатиот век, кога системот на државната власт е контролиран преку тајните служби и полициските сили. Во тоа мало место прават пекол со луѓето, кои на некој начин изразуваат сопствено мислење и убедување. Приказната се одвива во еден круг на семејство со 4 синови и една ќерка, кај кои што сосема ненајавено доаѓа човек кој се претставува како Јуда, а тие го доживуваат како спасител“ - рече промоторот.

Извадоци од романот читаше актерката Кети Дончевска Илиќ пред присутните.

Павловски е роден на 7 јануари 1942 година во демирхисарското село Жван. Негови попознати дела се :“Игра со љубов“, “Лудисти“, “Дува“, “Австралија, Австралија“, “Подвижни гробови“, “Изгубени во рајската градина“ и други.  Авторот е добитник на наградите Рациново признание, 11 Октомври, Гоцева повелба, Кочо Рацин и други.