Протестираа волонтерите во Општа болница Куманово

Велат дека со години работат за надомест од 3900 денари, а дополнителен проблем е што овој скормен надомест им доцни со месеци. Тврдат дека работат и по 12 часа дневно, а никој нема слух за нивните барања да добијат решенија за работа. Работата не им е проблем, но сакаат трудот да им биде соодветно платен и да имаат со што да ги прехранат семејствата.

Парите ги земаме 2 пати годишно. Јас сум волонтерка 4 години, а  има некои што подолго време се волонтери. Работиме како чистачки по 12 часа, дежурства се работат. Секаде низ Македонија дадоа решенија само во Куманово не - рече хигиеничарка.

Волонтерите велат дека во неколку наврати им е ветувано дека ќе добијат решенија, но досега нема ништо.

Од понеделник до петок само ветуваат и ништо. Секоја недела е исто. Дел од нас одевме кај директорот да не одиме сите. Не беше фер директорот што вака постапи со нас. Ни вети дека ќе не прими да не штрајкуваме и не не прими. Јас 3 години работам како хигиеничарка - вели Јулијана Зафировска, волонтерка.

Директорот на Општа болница Куманово, Ариф Љатифи одговори дека за многу брзо време ќе се реши статусот на 102 волонтери, хигиеничарки, болничарки, медицински сестри и тројца лекари по општа медицина.

На Министерство за здравство е поминато за трансформација на нивните договори. Во Фондот веќе поминало и чекаме од Министерството за финансии. Мислам дека овие денови ќе се заврши оваа работа бидејќи и тие имаат одредени работи со буџетот. Јас сум оптимист дека многу брзо ќе се реши оваа работа - изјави директорот.

Волонтерите рекоа дека ако не им се реши статусот во скоро време, ќе протестираат во Скопје пред Министерството за здравство и ќе бараат средба со министерот, Никола Тодоров.