Реконструкција на Градскиот стадион со нови трибини за 8.000 гледачи, најави Димитриевски, кандидат за советник од СДСМ

„Како еден од поголемите капитални проекти во програмата е реконструкција на Градски стадион со изградба на трибини за 8.000 гледачи, подобрување на спортската инфраструктура и пратечки објекти. Целта е да се создаде модерен спортски центар што ќе ги поттикне спортските активности и развој на локалната заедница. Со овој проект се унапредува спортскиот капацитет на градот и се потиикнуваат спортски активности, со привлекување повеќе публика и настани, а со тоа ќе се зајакне и локалниот економски развој“, кажа Димитриевски.

Рокот за реализација на овој проект е од 36 до 48 месеци, зависно од временските услови и организација на работите, а ќе чини 80. 000. 000 денари. Буџетот е предвиден преку ФФМ и УЕФА, да се обезбедат дел од средствата преку програми за развој на инфраструктурата, обично во износ од 20 до 40% од вкупниот буџет, зависно од проектот и нивните услови.  Општина Куманово пак, ќе обезбеди дел од финансиите, земјиште и инфраструктурна поддршка. Дополнителни извори Јавно- приватно партнерство, национални и регионални фондови, спонзори и донации.

Во програмата се предвидува и организација на училишни спортски лиги и натпревари меѓу училиштата. Преку проектот „Кумановски шампиони“ ќе се формираат училишни општински спортски лиги за основни и средни училишта во Куманово.

„Општината ќе ги обезбеди сите потребни материјални и логистички средства за оваа лига. Заедно со професорите по физичко и здравствено образование ќе ги мотивираме и ќе ги искалиме новите шампиони. Секако, предвидена е и мотивација - годишна награда „Најспортско училиште“ на Општина Куманово. Најавуваме спортски програми за лица со попреченост и поддршка за параспортски клубови. Спортски кампањи, семинари за здрав живот, програми за антистрес и анксиозност. Организација на локални турнири, маратонски трки и рекреативни спортски денови“, додаде Димитриевски.

Тој истакна дека вложувањето во спортот и младите не е само проект, туку и обврска кон иднината. Секое спортско игралиште секој млад спортист, секој клуб што добива поддршка е чекор кон поздрава, посилна и поодговорна заедница.