Режановце се подготвува за “Празијада“

- Од Умин Дол и Горно Којнаре и пошироко сите се поканети да бидат дел од ова и да видат што ќе се случува во сабота во Режановце. Ние како општина оваа година уште посилно ќе ја поддржиме и финансиски и организационо за да овој културен настан биде посетен. Како што е договорено ќе има гости и од збратимените градови. Секоја година планираме да ја збогатуваме оваа манифестација со нови содржини - изјави Жика Крстевски, раководител на секторот за спорт и култура во Општина Куманово.

Трајан Димковски, претседател на месна заедница Режановце и на Организациониот одбор рече дека бројот на производители на праз се зголемува,а празот е здрава храна која не се прска со пестициди.

- Начинот на подготвување и чување на праз можеби помалку е застапен во домовите во град. Сакаме да му дадеме значење, да се задржи традицијата на оваа култура. Не случајно е избрано селото Режановце, бидејќи е центар на регионот каде со декади наназад луѓето живееле од оваа култура. Тоа е поднебје каде празот успева, бара многу работа, бара вода - рече Димковски.

Од “Еко - гард“ велат дека лани манифестацијата беше успешна, а и годинава ќе се бираат домаќинки кои ќе подготват највкусни јадења, ученици кои напишале најдобри творби,цртале на тема “Ослободувањето на градот“.

- Ќе има заеднички ручек и заедничка веселба на сите собрани на оваа манифестација. Целта е да го промовираме регионот, да ги вклучиме сите производители кои сакаат да учествуваат , да се поттикне производството на празот, да се види вештината на жените, да се сочуваат обичаите - вели Зоран Бојковски, претседател на “Еко - гард“.

“Празијадата“ лани за првпат е организирана на иницијатива на месната заедница од селото Режановце, Етно шоп Беба и “Еко - гард“. Манифестацијата почнува во 11 и ќе трае до 14 часот. За граѓаните во 10.30 часот има организиран превоз од пред хотел “Кристал“.