Се бара инструментот што го снема од дворот на друштвото „Панче Пешев“

Инструментот е особено значаен и неопходен за работа на Оркестарот на изворни инструменти, кој настапува на бројни домашни и меѓународни фестивали, и ја претставува кумановската и македонската култура и традиција.

„Се вративме од фестивалот во Долнени и додека ги остававме другите инструменти на оградата сме ја заборавиле гуслата. Брзо се вративме да ја побараме, но веќе ја немаше. Претпоставуваме дека ја земал некој што поминувал оттука. Можеби и не знае дека е наша. Станува збор за инструмент кој има големо емотивно и професионално значење за нас и затоа апелираме да ни го вратат“, вели шефот на оркестарот Мирон Спасовски.

Тој додава дека оставиле одредено време и се понадевале дека пронаоѓачот ќе ја донесе гуслата, но доколку тоа не се случи и по овој апел, тогаш тие случајот ќе го пријават во полиција, за да се прегледаат камерите од околните објекти, кои го покриваат делот каде што била оставена гуслата и да се открие кој ја земал. 

Од друштвото ги повикуваат и граѓаните коишто имаат било каква информација во врска со овој случај да ја споделат со нив. 

Чесниот пронаоѓач гуслата може да ја донесе во просториите на друштвото „Панче Пешев“.