Се реконструира кровот на спортската сала Соколана, првата фаза од проектот ќе чини 240.000 евра

Градежните работи започнале на крајот на минатиот месец, а ги изведува фирмата „Филип инженеринг“ од село Бразда, скопко. Целокупната вредност на договорот за овој дел од работата е 14.763 милиони денари или 240.000 евра.

Реконструкцијата на Соколана започнаа кон средината на 2023 година, со претходно обезбедени дозволи од Министерството за транспорт и врски и согласност од Конзерваторскиот центар. Работите на кровот се во рамките на првата фаза кога се работеше на зајакнување на статиката на објектот и кровната конструкција. Во втората фаза е предвидено да се работи на фасадата и замена на столаријата, третата е резервирана за внатрешно уредување и адаптација на просториите за намената за која е и изградена. 

Како последно беше најавено партерно уредување на објектот, но локалната власт веќе вложи и 14,96 милиони денари за реконструкција на паркот, како и за обновување на постоечките и изградба на спортски терени веднаш до Соколана, со вредност од 4,49 милиони денари.

Во 2019 Владата по 20 години ги врати на Општина Куманово комплексот Соколана, Градскиот стадион, стрелиштето и спортската сала.

Спортската сала Соколана е симбол на богатиот спортски и забавен живот на Куманово од минатиот век, и граѓаните со нетрпение очекуваат да и се врати некогашниот сјај.