Седум мигранти од Египет откриени во возило кај Романовце

При сообраќајна контрола на Мобилната единица за безбедност на сообраќајот на патиштата при Секторот за сообраќајни работи, во 2 часот по полноќ било сопрено патничко моторно возило „Фолксваген Шаран“ со тетовски регистарски ознаки, управувано од С.И. (44) од Тетово.

„При контролата во возилото биле забележани лица кои при легитимирање немале никакви документи за идентификација. Во разговор со возачот, тој посочил дека требало да ги превезе лицата од Гевгелија до Куманово. Во возилото се превезувале седум лица, сите по нивен исказ државјани на Египет, на возраст од 17 до 52 години. Возачот и мигрантите се лишени од слобода. По целосно документирање на случајот ќе биде поднесен соодветен поднесок“, соопшти МВР.