Семејството Насевски незадоволно од обдукцискиот наод

 Вештачењето покажало дека на телото на починатиот нема траги на насилство, но не е позната причината за смртта,  додека анализата од коса што треба да покажат дали во крвта имало присуство на дрога, уште не се стигнати.

 - Во судот и Обвинителството не сакаат да ме примат и велат дека случајот е затворено. Јас барам да ми објаснат зошто наодот од косата уште го нема, иако поминаа четири месеци. Обдукцијата покажала  дека смртта е непозната и јас не го прифаќам таквото објаснување. Се сомневам дека моето дете е убиено, а не предозирано.  Чекаа 40 дена да поминат па да направат обдукција, да се распадне телото, за да не се добијат прецизни податоци - вели Снежана Насевска, мајка на Сашо.

Од судот во Куманово велат дека случајот за нив е затворен и предаден во Јавното обвинителство од каде понатаму ќе се одлучува како ќе се постапува. Таму треба да пристегне и наодот кој го бара мајката, и доколку има елементи Обвинителството ќе покрене постапка и ќе го врати предметот во Судот.

Насевски беше пронајден мртов на 24 септември на периферијата на Куманово од страна на случаен минувач. Полициско-судските екипи и лекар, утврдиле дека Сашо починал од предозираност, бидејќи имал 6 убодни рани од игла на надколениците и телото не било предадено на обдукција.

Неколку дена по трагедијата, семејството негираше дека Сашо е уживател на дрога и излезе со обвинување дека тој е убиен, бидејќи некој му се заканувал. Побара да се направи обдукција на телото, која беше извршена на 11 ноември мината година.