И фонтаните пред спортската сала, а не само на градскиот плоштад ќе се реконструираат со предвидените 130.000 евра, велат од Општина Куманово

Реконструкција на три фонтани на градскиот плоштад и шест фонтани пред спортската сала, како и поставување на нова урбана опрема на двете локации, опфаќа проектот за кој Општина Куманово планира да потроши 8.1 милион денари или 130.000 евра. 

Ова појаснување од Општина Куманово уследи по реакцијата на советниците од опозицијата и граѓаните дека тоа се големи пари само за реконструкција на фонтаните и урбаната опрема на градскиот плоштад. 

„Не се точни информациите дека Општина Куманово планира да потроши износ од 130.000 евра само за реконструкција на фонтаните на градскиот плоштад и урбана опрема, туку со овие средства ќе се реконструираат 3 фонтани на градскиот плоштад, плус 6 фонтани во паркот пред спортската сала, како и севкупна урбана опрема на градскиот плоштад и паркот пред спортската сала“, велат од Општина Куманово.

На последната седница на Советот на Општина Куманово беше побарано да се преиспита одлуката за оваа инвестиција, бидејќи градот и населбите имаат други приоритети.

Тогаш беше кажано дека од предвидени вкупно 8.1 милиони денари или 130.000 евра, за фонтаните предвидени се 6,9 милиони денари или 112.000 евра, а за набавка на урбана опрема, клупи и канти за смет 1,2 милиони денари или 19,5 илјади евра. Не беше посочено дека парите ќе се потрошат за уредување на две локации.

„Ова за мене е беспотребно фрлање на пари, 110.000 евра за средување на големиот плоштад, што велат кумановци „малиот го средивте, па сега и големиот да го доправите“. Даските кои треба да се наместат, клупите ги менувавме пред неполни 6 или 8 месеци“, кажа Благојче Јаќимовиќ од НСДП.

Раководителката на Сектор за комунални работи, Лидија Ланг Спасовска, тогаш кажа дека тое е само проекција на средства кои не мора да бидат потрошени.

„Не мора да значи дека ќе бидат потрошени толку средства, зависи во кој обем ќе биде реконструкцијата. Можеби во тендерската постапка многу пониски ќе бидат понудите “, посочи  Ланг Спасовска.

Таа објасни дека во фонтаните ќе бидат поставени нови водни пумпи, ново осветлување затоа што постоечкото е целосно руинирано. Освен за подвижните клупи ќе се работи и за оние се кои се опшивка на жардињерите и тревниците на плоштадот.