Со линеарното зголемување од 1.000 денари оштетни се 318.000 пензионери, вели Тренчевска

„Според сегашниот закон кој го донесе СДСМ, пензиите се усогласуваат двапати годишно, во март и септември, врз основа на растот на платите и трошоците за живот. Доколку Владата не го менуваше законот, пензиите во септември ќе се зголемеа за околу 5%. Тоа значи дека за пензија од 20.000 денари, зголемувањето ќе беше 1.000 денари, исто како и со линеарното, но за пензија од 25.000 денари, пензионерите би добиле 1.250 денари, а со новото решение добиваат помалку, само 1.000 денари“, изјави Тренчевска на прес-конференција.

Според пресметките на СДСМ, како што кажа таа, 92,5% од пензионерите, или над 318.000 граѓани, се директно оштетени со оваа одлука и ќе земат помалку средства отколку што им следува по закон.

„Дополнително, следното усогласување во март 2026 ќе се пресметува на помала основица, што значи дека и понатаму пензионерите ќе добиваат помалку од заслуженото. Со ова решение, Владата практично ги излажала и им ускрати од пензиите на пензионерите двапати“, рече поранешната министерка за труд и социјала.

Тренчевска додаде дека со ваквата одлука се нарушува принципот на правичност, секој да добива според својот придонес, и се испраќа порака дека вложувањето во пензискиот систем нема смисла, што го загрозува фондот.

„Анализата покажува дека денес на еден пензионер има само 1,6 работници, што е најлош однос досега, а дефицитот на фондот е над 47% и расте. Наместо Владата да го стабилизира системот, таа со популистички и манипулативни потези го уништува. Бараме Владата веднаш да го повлече овој предлог и да им ги врати на пензионерите парите што им следуваат, правично и согласно законот“, кажа Тренчевска.

Предлогот на Владата е ставен на дневен ред на денешната седница на Собранието.