Строги казни за дивеење на спортски натпревари

За новите одредби во Законот за спречување на насилство на спортските терени денеска дискутираа претставници од спортските клубови во Куманово, Општински сојуз на спортови и СВР Куманово.

При тоа беше потенцирано дека организаторите во рок од 48 часа пред почетокот на натпреварот треба уредно да пријават во Полиција и да обезбедат редари од свои редови или од агенција за обезбедување. Организаторите ќе предвидуваат колкав е ризикот да дојде до инцидент, а полицијата одлучува колку службеници ќе испрати на спортските терени.

- Пред натпревар уредно се најавуваме не два, туку четири дена однапред. Се случувало полицијата да не стигне на време и делегатите не почнуваат натпревар бидејќи така е предвидено во статутот на Фудбалска федерација на Македонија. Половина час се случувало да чекаат. Некогаш има 200, 300, 500 гледачи, но ризик може да има и ако се 15, 30 гледачи - вели Дејан Додевски, претседател на клубот за мал фудбал “КМФ Биџо“.

Од велосипедскиот клуб  “Вело - М“ потенцираа дека досега имале добра комуникација и соработка со полицијата.- Ние сме давале плакети и сме изразувале благодарност до СВР Куманово.

Досега не сме имале проблеми никакви. Кога ќе видам натпревар со девијации, тоа е срамно за гледање. Законот е сосема на место и ќе ме радува навивачите во иднина да навиваат културно - изјави Марјан Петровски, спортски директор на “Вело - М“.

Во Законот за спречување на насилство на спортските терени последните измени се направени  во 2011 година, а со новите измени кои наскоро ќе бидат вметнати за палење на знаме, нарушување на јавниот ред и мир на натпревари ќе има и затворски казни.