Возачи вежбаа укажување прва помош

Полицијата по случаен избор запираше автомобили, а возачите имаа задача да покажат како се снаоѓаат во исценирана сообраќајна несреќа и да помогнат на повредено лице.

Им беше дадена повреда и доколку знаат треба сами да ја санираат, а доколку не ние ќе им помогнеме. Оваа акција се прави неколку години по ред. Возачите веднаш прифаќаат и обично знаат да укажат прва помош бидејќи имаат поминато обука - вели Магдалена Бошковска, волонтер во Црвен Крст.

Оваа активност е дел од акцијата “Да ги заштитиме децата во сообраќајот“ која се спроведува веќе два месеци. Ученици ќе им поделат флаери на возачите за да внимаваат на децата како учесници во сообраќајот посебно покрај училиштата.

Уште еднаш апел до граѓаните и јакнење на свеста дека прва помош е морална, законска обврска за безбедност во патниот сообраќај. Доколку се случи сообраќајна незгода да се укаже прва помош затоа што во даден момент многу зависи од неа. Праксата покажува дека кога ќе наидат на такво нешто само сакаат да видат што се случува и да избегаат, а не да повикаат помош - изјави Виолета Богдановска од одделот за превенција во СВР Куманово.

Возачите кои покажаа како се укажува прва помош симболично добија пенкало со логото на проектот. Организаторите на настанот потенцираа дека неукажувањето прва помош на повреден во сообраќајна несреќа е казниво.