Здравствениот дом отвори лабораторија во амбулантата „Тоде Мендол“

Тоа е дисперзирана лабараторија во која ќе се земаат примероци од крв, урина и други примероци за анализа за дијагностичко - специјалистички цели.

„Сметаме дека на пациентите многу повеќе ќе им одговара да се обратат таму, да не доаѓаат до центарот, со што ќе заштедат на време и секако на превоз. За отварањето на пунктот се известени матичните лекари од градот и околината, за да ги информираат и упатат пациентите“, истакна д-р Милена Спасовска Димовска, началник на биохемиска лабараторија на Здравствен дом Куманово.

Ова е втора обид да се дисперзираат услугите и да се растерети централната лабораторија што се наоѓа во објектот на т.н. Уред. Во 2022 година таква лабораторија беше отворена во Амбулантата „ Гоце Делчев“, но по три месеци е затворена поради слаба искористеност. Сепак одлуката не е конечна, можеби во иднина би се обиделе повторно да се примени ваквата пракса на функционирање на повеќе пунктови во градот.

„Пациентите по навика си доаѓаа во зградата на Здравствен дом. Попатно и си завршуваа некоја обврска во центарот на градот, па немаше економска оправданост да продолжиме со тој проект. Ова е тест период за „Тоде Мендол“ и ќе видиме како ќе се одвиваат работите таму“, објаснува д-р  Димовска.

Цел на ваквите пунктови е намалување на гужвите и притисокот на лабораторијата во центарот, заштита на граѓаните од ширење на болести кога поголеми групи се задржуваат во затворен простор и секако поголема достапност на заинтересираните пациенти за услугата.

Веќе воспоставена е праксата резултатите електронски да се испраќаат на апликацијата Мој термин од каде секој матичен лекар може да ги испечати, што повторно има голема предност и за пациентите и за здравствените работници.