Зголемен бројот на заболени од варичела

Регистрирани се 37 заболени во декември, а во наредниот период се очекува оваа бројка да расте, информираат од Центарот за јавно здравје Куманово. Епидемиологот Јадранка Стаменковска  вели дека болеста се јавува сезонски и најчесто од неа заболуваат децата.

„Застапени се деца до 6 години најголем процент и од 7 до 9 годишна возраст, тоа се најчестите возрасни групи кои што се зафатени со заболувањето. Тоа се оние колективи, градинките и училиштата. Заболувањето поминува во три стадиуми, со првиот стадиум со појава на главоболка, истоштеност, зафаќање на горните дишни патишта, со појава на едни визикули кои  што прскаат и за еден до два дена се појавува исипен стадиум кој се јавува во налети и е различен по структура. Овие налети се јавуваат во 10 до 30 дена на овој исип, така што телото на детето е исипано“- рече Стаменковска.

Болеста се лекува со соодветна терапија, а на заболените деца им се даваат течни пудри за да не се чешаат. Просториите треба да се проветруваат и домашната средина во која е детето треба да биде чиста.

Од вкупниот број на  заболените деца, малку е поголем бројот на деца кои потекнуваат од урбана средина. Последниве години и во мај, јуни и јули се зголемува бројот на заболени од варичела.