Жителите на Довезенце бараат мост на Крива река

Пред 15 години изградиле премин, но се плашат дека при поголем водостој ќе се урне. Од локалната самоуправа неколку пати барале да им се изгради мост, но безуспешно.

Нашите маки се многу големи, посебно овој период кога водостојот на реката драстично се зголемува, а имотите и луѓето од другата страна се отсечени. Доколку не се обезбеди мост на Крива Река ќе мора луѓето со километри да патуваат на простори каде што нема пат за да стигнат на другата страна, што ќе претставува вистинска голгота особено зимско време. Би сакале да го прашаме градоначалникот дали е свесен за тежината на нашиот проблем. Нека каже колку пати само до него се имаме обратено за изградба на мост. Кога веќе конечно ќе се реши нашиот проблем, поради кој со години не можеме нормално да живееме. Нашето село е поделено со реката, со нејзиното надоаѓање постои опасност да бидат блокирани многу фарми, куќи и стотици хектари обработиливо земјиште и пасишта - вели Драги Додевски, претседател на месната заедница во Довезенце.

Од градоначалникот на Куманово, Зоран Дамјановски бараат да излезе и да каже што планира за решавање на овој проблем. Во селото живеат околу 100 жители, плус има околу 80 викендици.