Како да се ослободите од пролетниот умор

Уморот е предизвикан од промената на времето, но и од периодот на исхрана, карактеристична за зимата, кога на менито има многу месо и месни производи, заради што се јавува недостаток на витамини.

Нутриционистите препорачуваат дека пролетта е време кога треба да се премине на т.н. зелена храна- разни салати, свежи зелени зачини, коприви, зелка и други намирници, кои се важни за здравјето на луѓето.

Тие сметаат дека две намирници особено се важни за да се воспостави рамнотежа во организмот- ротквици и лук.

Ротквиците се богати со разни витамини. Содржат голем процент на витамин Ц, речиси исто колку и цитрусното овошје. Богати се и со витамин А и витамините од групата Б, заради што се благопријатни за нервниот систем.

Исто така, во нив има и калциум, магнезиум, фосфор, калиум, железо и други минерали. Тие го поттикнуваат апетитот и ја враќаат енергијата. Ротквиците го прочистуваат организмот и помагаат да се исфрлат токсините и микроорганизмите што и влијаат на појава на болести.

Се препорачува во салатите задолжително да се става и лук.

Лукот е , исто така, многу корисен , го нормализира варењето, штити од настинки и вируси. Го регулира шекерот во крвта , крвниот притисок, ја прочистува крвта и ја подобрува работата на нервниот систем.

Доколку во рана пролет во својата исхрана ги вклучите салатите со лук и ротквици, пролетниот умор ќе помине многу бргу или воопшто нема да го почувствувате.