Зачленете се во нашиот клуб на читатели и најновите текстови ќе ги добивате на вашата мејл адреса
Срамнети со земја се семафорот и сообраќајниот знак на улицата „Иво Лола Рибар“, на една од најфрекфентните раскрсници во градот, со булеварот „Октомвриска револуција“ и „Ѓорче Петров“.
Семафорот е скршен вчера по полноќ, кога во него удрил автомобил.
Според полицијата, во 1.30 часот Т.Н.(23) од Куманово, додека управувала ауди со велешки таблички и се движела по булеварот „Октомвриска револуција“ од периферијата во центарот на градот, на раскрсницата свртела лево, изгубила контрола на возилото, и удрила во семафорот и сообраќајниот знак на десната страна на коловозот.
Покрај возачот, во возилото имало уште тројца сопатници, но нема повредени. Причинета е само матерјална штета.
Од Општина Куманово велат дека се запознаени со случајот и веќе преземале мерки за набавка на нов семафор.
- Бидејќи семафорот и сообраќајниот знак се целосно откорнати и не можат да се поправат, мора да поставиме нови. Ние веќе доставивме барање до фирмата во Скопје која ја одржува сообраќајната сигнализација во градот да набави нов стоб, пешачка лантерна и се друго што е неопходно за враќање на семафорот во првобитната состојба, - вели Момчило Јовановски, заменик раководител во Секторот за комунални дејности и ифраструктура.
Тој додава дека штетата ќе мора да ја надомести девојката што ја предизвикала сообраќајката и што го скршила семафорот и знакот, и тие веќе го добиле записникот од МВР.
Граѓаните од околните згради кажуваат дека ноќтта ги разбудил силен удар, но велат дека тоа не е ништо ново, бидејќи се под постојан стрес од постојаната бука од неприлагодената брзина на возила и и мотоцикли. Затоа бараат од Полицијата да ги зголеми сообраќајните контроли во ноќните часови во овој дел од градот, и да им стави крај на несовесните возачи, кои булеварот го користат за рели трки и возат со огромна брзина.