Домот за стари лица доби кујна по Хасап

Градежните работи траеа во изминатите три месеци. Комплетната реконструкција овозможи замена на водоводната, канализационата и електрична инсталација. Замена на прозорци, врати и набавка и инсталација на најсовремена опрема за готвење, која ги задоволува сите Хасап стандарди, пропишани за вакви професионални кујни. Вкупната инвестиција изнесува над 90.000 евра и во целост е покриена од сопствени средства, - изјави директорот Дејан Стојановски.

Домот постои 4 децении и неговото успешно функционирање е многу значајно за Општина Куманово и државата, рече директорот, и напомена дека потребата од проширување и изградба на нови сместувачки капацитети од ваков вид постојано се зголемува.

Лицата од третото доба во својот живот имаат потреба и заслужуваат нега и 24 часовна поддршка, а тоа го овозможуваат само домовите за стари лица. Оваа година се уште не е завршена за нас, ни претстои внатрешна и надворешна реконструкција на домот, која има за цел да ги подобри условите за престој во установата, а во тек е постапка за набавка на нови професионални машини за перење и сушење на алишта, - додаде Стојановски.

Во домот се сместени 170 лица, а ги опслужуваат 52 вработени, кои им пружаат 24 часовна грижа и нега.Капацитетот на домот е 178 корисници.

Кумановскиот старачки дом е еден од трите домови под надлежност на државата, и интересот за сместување е голем.

Градоначалникот Максим Димитриевски, најави дека во наредниот период Општината ќе помогне да се прошират сместувачките капацитети на постоечкиот дом, но ќе се обиде и преку проекти и фондови да иницира изградба на нови.