500x100-1
19. 04. 2019 15:50

Куманово доби бесплатна библиотека на отворено

Куманово доби бесплатна библиотека на отворено

Од денеска, кумановчани ќе можат да позајмуваат и да донираат книги во првата мала бесплатна библиотека во градот.

Библиотеката е поставена пред Центарот за култура „Трајко Прокопиев“ во Куманово, а донирана е од затворот „Куманово“.

„Станува збор за мала инсталација изработена од дрво, со околу 80 книги, кои им се на располагање на сите  кои помунуваат тука. Идејата ни беше да направиме нешто корисно и несекојдневно за нашите сограѓани, да го привлечеме вниманието на љубителите на читањето и да поттикнеме размена на книги. Добивме поддршка од раководството на Центарот за култура и Градската библиотека „Тане Георгиевски”, кои ни ги подарија првите книги на македонски, албански и англиски јазик, - изјави директорот на затворот Марјан Спасовски.   

Под мотото „Земи, прочитај, врати“- граѓаните ќе можат бесплатно да земаат книги од библиотеката и да остават свои.

Директорот на Центарот на култура „Трајко Прокопиев“, Сашо Тодоровски, очекува дека идејата ќе заживее и ќе се промовира читањето меѓу граѓаните. Планирано е вакви библиотеки да се постават уште на неколку локации, како што е Градскиот кеј, плоштадот и во парковите.

„Little Free Library“ за слободна размена на книги заживеа во 2009 во САД, а се реализира во повеќе од 80 земји во светот.