„Не биди ѓубре“ собра 50 вреќи смет помеѓу зградите на „Октомвриска“

На шестата еколошка акција се чистеше околу стамбените згради, со цел да се мотивираат оние кои живеат во близина и го направиле сметот да се вклучат во чистењето.

„И покрај тоа што сите беа известени, многу мал број на граѓани се приклучија. На акцијата дојдоа оние кои веќе редовно доаѓаат на сите акции до сега, т.е. заинтересираноста расте со многу мал интензитет. Главната цел на акциите е да се приклучат повеќе луѓе и да станат посвесни каде го фрлаат ѓубрето. Во спротивно единствен лек се паричните санкции. Ако не ни помагаат барем да престанат да загадуваат" - вели Јована Спасиќ, волонтер во „Не биди ѓубре".

Од "Не биди ѓубре", додаваат дека се` уште не може да се исчисти онолку колку што луѓето можат да извалкаат. Тоа може да се забележи и по претходно исчистените локации, затоа што повторно се полни со смет.

 Од друга страна, охрабрува заинтересираноста на малите претпријатија кои нудат помош со цел да ја олеснат работата на "Не биди ѓубре".