Се испитува случајот на истепаниот ученик

Полицијата и просветните инспектори  во присуство на родителите земаа изјави од соучениците во одделението, кои биле сведоци на немилиот настан, додека дисциплинската комисија од училиштето заседаваше за да го испита однесувањето на нивниот колега. Сите се воздржуваат од изјави додека не заврши постапката. Лекарскиот извештај покажал дека кај Ф.С. повредата е задобиена од физичко насилство и доколку се утврди одговорноста на професорот против него ќе биде поднесена прекршочна и кривична пријава. Физичката пресметка на професорот со ученикот се случила вчера на часот по физичко, кога детето фрлило мастика кон корпата и го налутило професорот.

Тој ме нападна дека го гаѓам него и ме викна да излезам пред таблата. Почна да ми удира шлаканици, а потоа ме фати за образот и ми удри неколку песници - раскажуваше ученикот.

Со модринки по образот и раскрварено непце во устата, родителите случајот го пријавиле во кумановската полиција. Тие побараа јавно од надлежните институции да испитаат со какви методи се служат професорите кога ги дисциплинираат учениците и да го казнат професорот доколку ги пречекорил своите законски овластувања. Тие најавуваат и приватна тужба против просветниот работник.

Професор С.К (60) не признава дека го тепал детето, туку тврди дека само го уштипал по образот, бидејќи тоа го гаѓало со гумено топче.