Зачленете се во нашиот клуб на читатели и најновите текстови ќе ги добивате на вашата мејл адреса
Синдикатот на работниците од управата, правосудните органи и здруженија на граѓани (УПОЗ), до Владата ќе поднесе иницијатива за воведување на седумчасовен работен ден и прогласување на 2-ри јануари и 2-ри мај за неработни денови .
Претседателот на УПОЗ Пецо Грујовски, посочи дека е време Македонија да се приклучи на европските трендови и во новиот Закон за работни односи кој е во фаза на изработка да се утврди седумчасовен работен ден, односно 35-часовна работна недела.
„Со седумчасовното работно време ќе се врши подобра распределба на трудот. Со намалување на работното време за 10,2 проценти од секој работник, теоретски ќе доведе до потреба од ангажирање на дополнителен број работници. Од социјален аспект нашето барање го аргументираме со тоа што ќе се зголемат можностите за грижа кон семејството и рекреација“, изјави Грујовски.
Во однос на иницијативата за измена на Законот за празници, Грујовски нагласи дека во 2007 година дотогашниот празник 2-ри јануари се укина како неработен, додека годинава со одлука на Влада повторно се прогласи како неработен.
„Реакциите за ваквата одлука беа позитивни и кај вработените во администрацијата и стопанството. Бидејќи во овој период од годината работните процеси се сведени на минимум како во јавниот, така и приватниот сектор, предлагаме 2-ри јануари повторно да биде прогласен за празник“, изјави Грујовски.
Традицијата на одбележување на меѓународниот ден на трудот, посочи Грујовски, сметаме дека треба да продолжи и покрај 1-ви и 2-ри мај да биде прогласен за празник.