20. 07. 2020 14:10

Една дива депонија не може политички да го оцрнува Охрид

Една дива депонија не може политички да го оцрнува Охрид

 Пишува Соња Рилковска

Рецензираме вест објавена на порталот Охрид24 на 18.јули 2020, под наслов „(ФОТО) Тажни слики од Охрид: Неспособност и башибозук на СДСМ“.

Насловот сугерира дека објавените фотографии се тажни, и тие се повод да упатат коментари од типот „неспособност и безредие“ кон СДСМ како владејачка партија на локално ниво.

Целиот текст, во суштина е фејсбук статус на Комисијата за инфраструктура, урбанизам и транспорт на ВМРО ДПМНЕ, којшто порталот го пренесува. Градоначалникот е обвинет за неподигнатиот градежен шут, што се гледа на три фотографии. Дури и се тврди дека отпадот стои со месеци.

Како тргнале СДСМ тешко дека ќе го задржат статусот на Охрид во УНЕСКО..Градоначалникот на Охрид Константин Георгиевски презентира тотална пасивност и незаинтересираност за состојбата во која се наоѓа општината.Во сред туристичка сезона купови на градежен шут со месеци стои покрај самото езеро. Некогашната градска плажа СДСМ ја претвори во градска депонија.Константин Георгиевски – уште еден неспособен кадар на СДСМ, се вели во текстот на Комисијата за инфраструктура, урбанизам и транспорт на ВМРО-ДПМНЕ.

Вистиномер открива дека фотографиите се направени на потегот Далјан – Грашница, локација позната како дива депонија на несовесните жители од истата населба. Според надлежните, екипите на јавното комунално претрпијатие работат во три смени, постојано се на терен, но секојднено на различни локации никнуваат нови диви депонии.

Една локација со отпад не смее и не може да се поврзува со статусот на УНЕСКО, особено кога се знае дека токму оваа локална гарнитура речиси една година презема конкретни мерки и активности за Охрид да го зачува брендот на светско природно и културно наследство.

Порталот кој ја пренесува веста, потполно непрофесионално го прави тоа, пренесувајќи го ФБ статусот на партиската комисија. Не се обиделе ниту да посочат каде се направени фотографиите, на која локација и кога. Нема никаков доказ дека отпадот таму стоел со месеци…

Уште понепрофеионално е што порталот не се обидел да добие одговор од ЈП „Охридски Комуналец“, надлежно за расчистување на депониите, туку неосновано целата вина се фрла врз градоначалникот и СДСМ (член 1. од Кодексот на новинари).

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар

Овој напис е изработен во рамките на Проектот за зголемување на отчетноста и одговорноста на политичарите и партиите пред граѓаните, Вистиномер, имплементиран од Метаморфозис. Написот e овозможен со поддршка на американската непрофитна фондација (NED - National Endowment for Democracy). Содржината на рецензијата е одговорност на авторот и не ги одразува ставовите на Метаморфозис и National Endowment for Democracy или нивните партнери.