Делта варијантата на коронавирусот е научно докажана реалност

Објава на Фејсбук опасно дезинформира дека делта варијантата не постои и дека вакцината е штетна. Според Светската здравствена организација, делта варијантата на коронавирусот е официјално идентификувана во 124 земји. Здравствените авторитети постојано укажуваат дека бенефитите од ковид вакцината се поголеми отколку ризиците од неа. И покрај тоа што е можно вакцинирано лице да се зарази со коронавирусот, сепак, вакцината штити од тежок тек на болеста и во висок процент спречува хоспитализации и смртност

Фото: pixabay.com

Додека вакциналниот процес се трка со високо преносливата делта варијанта на коронавирусот, односно додека здравствените власти во земјава се обидуваат да постигнат колективен имунитет или барем што повисоко ниво на имунизација на граѓаните за да се избегнат тешки есенски денови поврзани со ковид пандемијата, на Фејсбук продолжува ширењето на непроверени и неточни информации поврзани со самите варијанти.

Во постот што го рецензираме се тврди дека делта варијантата на коронавирусот не постои и дека вакцината е штетна. Се наведува и концепцијата дека вакцината е ,,дигитализација на човештвото”, иако е сосема нејасно што значи тоа, па на крајот се заклучува дека  е „убиец на луѓето“.

Наспроти овие медицински неиздржани тврдења и наративи кои ги имаат сите карактеристики типични за теориите на заговор, каде една мала група луѓе е против човештвото и работи на негово масовно наштетување, вистината е дека делта варијантата и тоа како постои. Сите вируси природно мутираат со текот на времето.

Според Светската здравствена организација (СЗО), делта варијантата на коронавирусот e официјално идентификувана во 124 земји.

Според податоците објавени од Институтот за јавно здравје во Англија, делта варијантата вклучува 99 проценти од случаите секвенционирани од 27 јуни до 3 јули, додека американскиот Центар за контрола и превенција на болести известува дека делта варијантата е потрансмисибилна отколку претходните.

Варијантите на коронавирусот не само што се секвенционирани, туку се и испитувани во лаборатории и кај клеточни култури и кај животински модели на инфекција, изјави доктор Џејсон Киндрачук, асистент професор за вирална патогенеза на Универзитетот Манитоба во Канада за „Ројтерс“.

Според него, не само што секвенците биле идентификувани во 2020 година, туку и варијантите кои се загрижувачки ги заменуваат постоечките варијанти на разни локации во светот и пошироко од областите каде што примарно биле идентификувани.

Нил Фергунсон од Империјал колеџот во Лондон, во јуни рече дека делта варијантата се проценува да биде за 60 проценти попренослива отколку алфа варијантата, а Центарот за контрола и превенција на болести објави дека оваа варијанта е попренослива отколку претходните.

Според европскиот центар за превенција на болести, делта варијантата се очекува да претставува 90 проценти од сите циркулирачки Сарс Ков 2 вируси во Европската унија до септември 2021.

Тврдењето дека вакцината е штетна, не е аргументирано. Центарот за контрола и превенција на болести е дециден дека бенефитите од ковид вакцината се поголеми отколку ризиците од неа.

И покрај тоа што е можно вакцинирано лице да се зарази со коронавирусот, сепак вакцината штити од тежок тек на болеста и во висок процент спречува хоспитализации и смртност. Оттука, не само што вакцината против ковид не е масовен убиец на човештвото, туку таа спасува животи.

Докторандот на Институтот Каролинска во Шведска, Харис Бабачиќ, преку пример објаснува како се спасуваат животите со вакцините.

Ефикасност од 99 проценти во спречувањето на смрт од ковид-19 би значело дека, ако од 100 илјади невакцинирани починале илјада луѓе, од 100 илјади вакцинирани ќе починат 10 луѓе доколку се заразат. Не значи дека нема никогаш повеќе да видиме луѓе да починат од ковид-19 доколку сите ги вакцинираме. Ќе гледаме, но разликата ќе биде огромна, споредено со тоа да не го вакцинираме населението. Со дадениот пример, тоа се 900 спасени животи на 100 илјади вакцинирани. Се надевам дека ова ќе ги разреши дилемите во јавноста доколку имало некакви забуни, напиша Бабачиќ на Фејсбук.

Досега во земјава регистрирани се 122 несакани реакции од администрираната доза во Агенцијата за лекови и медицински средства и сите тие реакции биле благи и опишани во упатствата за користење.

Поради изложената аргументација оценуваме дека тврдењето дека делта варијантата е непостоечка е дезинформација, а тврдењето дека вакцината е штетна е невтемелено во реалните состојби.

 

 

 

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар