ФДА не рекла дека вакцините убиваат повеќе луѓе отколку што спасуваат

Стив Кирш не е вработен во Американската агенција за храна и лекови (ФДА), па оттука и неговите ставови во никој случај не можат да се оценат како ставови на Агенцијата, ниту, пак, може да се каже дека имало превирања во ФДА во врска со квалитетот на вакцините. Кирш не е медицинско лице и неговите наводи не се научно базирани. Тој се повикува на системот ВАЕРС до кој несакани ефекти по вакцинација може да пријави секој. Според тоа, тврдењето во овој пост на Фејсбук, дека ФДА излегла со став оти вакцините против ковид-19 „убиваат повеќе луѓе отколку што спасуваат“ е дезинформација. Тоа е став на поединец, кој нема никаква врска со ФДА

Пост на Фејсбук шири дезинформации дека вработен во Американската агенција за храна и лекови (ФДА), Стив Кирш, изјавил дека вакцините против ковид-19 убиваат повеќе луѓе отколку што спасуваат. Ова не е точно, бидејќи Агенцијата не излегла со таков став, а Кирш не е вработен во ФДА.

ПРЕВИРАЊА ВО ФДА!

УБИСТВЕНИТЕ ВА*СИНИ, ГРИЖА НА СОВЕСТ ИЛИ ???

▪︎Иако Кирш е електро инжинер во ФДА, јавно проговори за оставката на двајца водечки службеници, поради масовното политичко  мешање во интерес на органите за лекови!

▪︎Кирш ја критикуваше сомнителната безбедност на ва*сините и очигледното незнаење во пријавувањето на сомнителни несакани ефекти.

▪︎ Се фокусирал на слонот во собата, за кој никој не сака да зборува,  дека ВА*СИНИТЕ УБИВААТ ПОВЕЌЕ ЛУЃЕ, ОД КОЛКУ ШТО СПАСУВААТ!, се вели во објавата која ја анализираме.

Постот се повикува на наводи од текст објавен од веб-страница која неретко објавува дезинформации и теории на заговор поврзани со пандемијата.

Точно е дека Стив Кирш, кој, патем, не е ниту доктор, ниту медицински експерт, изјавил дека „вакцините убиваат повеќе луѓе отколку што спасуваат“. Ваквата негова изјава ФДА ја оцени како изјава која „не се базира на научни докази“.

Забелешките на Кирш биле дадени за време на делот за отворени коментари на состанокот на комитетот на ФДА одржан на 17 септември, посветен на бустер вакцината на „Фајзер“.

На снимката на која се слуша неговото обраќање за време на отворениот дел на состанокот на ФДА, Кирш се претставува себеси како извршен директор на Фондот за рано лекување на ковид-19, фонд кој промовира антивирусни лекови.

Изјавите дадени од г-дин Кирш за време на отворениот јавен претрес на состанокот не беа базирани на наука и се спротивни на мисијата на ФДА за јавното здравје, изјавила за Агенцијата „Франс прес“ (АФП) Абигејл Капобијанко, лице за односи со јавност на ФДА.

Од ФДА во изјава за „Ројтерс“ посочиле дека Кирш никогаш не бил вработен во ФДА, ниту, пак, бил член на Советодавниот комитет за вакцини и сродни биолошки производи на ФДА. Американскиот претприемач поднел барање да зборува на отворениот јавен претрес на состанокот кој е отворен за секого, се наведува во соопштението на ФДА.

ФДА однапред не ги проверува забелешките од говорниците за време на отворениот дел за јавна расправа на состанокот. Понатаму, изјавите дадени од г -дин Кирш за време на отворениот јавен претрес на состанокот не беа базирани на наука и се спротивни на мисијата за јавно здравје на ФДА, изјавил за Ројтерс портпаролот на Агенцијата за храна и лекови.

 

ВАЕРС Е РАН СИСТЕМ ЗА ПРЕДУПРЕДУВАЊЕ

Неколкупати во своето излагање Кирш се повикува на ВАЕРС, американскиот систем за пријава на несакани ефекти по вакцинација. Официјалниот опис на ВАЕРС вели дека системот „содржи информации за непроверени извештаи за несакани дејства (болести, здравствени проблеми и/или симптоми) по имунизацијата со вакцини со дозвола од САД“, и дека прифаќа извештаи „од никого“.

ВАЕРС системот користи метод на широк дијапазон на информации, научен пристап со кој огромен број на груби и дури и недоверливи информации се спојуваат, за да се најдaт врските меѓу нив. Индивидуалните пријави и сите детали во нив не се потврдени и верифицирани, станува збор за случаи каде со самопријавување се даваат информации и тие не се поентата на пристапот на ВАЕРС, односно нивната цел! Станува збор за ран систем на предупредување, а не точен инструмент за мерење!

Капобијанко во изјава за АФП рекла дека „ФДА бара од здравствените работници да пријават каква било смрт по вакцинацијата против ковид-19 на ВАЕРС, дури и ако не е јасно дали вакцината била причината“.

Ова значи дека извештаите за несакани реакции до ВАЕРС по вакцинацијата, вклучително и смртни случаи, не мора да значат дека вакцината предизвикала здравствен проблем, изјавила таа, нагласувајќи дека смртноста по вакцинацијата против ковид-19 е ретка.

Повеќе од 380 милиони дози вакцини против ковид-19 беа администрирани во Соединетите држави од 14 декември 2020 година до 13 септември 2021 година. За ова време, ВАЕРС прими 7.653 пријави за смрт (0,0020%) меѓу луѓето кои примиле вакцина против ковид- 19, изјавила Капобијанко.

Од сето погоре можеме да заклучиме дека Кирш не е вработен во ФДА, па оттука и неговите ставови во никој случај не можат да се оценат како ставови на Агенцијата, ниту, пак, може да се каже дека имало превирања во ФДА во врска со квалитетот на вакцините. Кирш не е медицинско лице и неговите наводи не се научно базирани. Тој се повикува на системот ВАЕРС до кој несакани ефекти по вакцинација може да пријави секој. Според тоа, тврдењето дека ФДА излегла со став дека вакцините против ковид-19 „убиваат повеќе луѓе отколку што спасуваат“ е дезинформација. Тоа е став на поединец кој нема никаква врска со ФДА.

 

 

 

 

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар