Нашинец од Франција подари новогодишни пакетчиња на сите 300 ученици во Општина Старо Нагоричане

24.12.2020 09:39 | KumanovoNews

Речиси триста новогодишни пакетчиња им беа поделени на учениците од сите одделенија во основните училишта во Општина Старо Нагоричане, подарок од нашинец од Франција.

Нашинец од Франција подари новогодишни пакетчиња на сите 300 ученици во Општина Старо Нагоричане

Новчо Спировски е пензионер, кој повеќе од 50 години работел и живее во Париз, а сега за новогодишните празници со сопругата дошле во неговото родно село Младо Нагоричане и се договориле да ги израдуваат учениците со подароци.

„Секоја година донирам по нешто и овојпат одлучив тоа да бидат пакетчиња за учениците од основните училишта во општината од којашто и јас потекнувам. Сакав да ги израдувам дечињата на село, бидејќи ретко кој се сеќава на нив, а тие живеат во потешки услови од нивните врсници во градот. Срцето ми е полно кога ги гледам колку се радуваат и како искрено се заблагодаруваат. Сакам да ги потикнам и другите луѓе коишто се во можност да помогнат“, - вели донаторот Новчо.

Во името на учениците се заблагодари градоначалничката на Општина Старо Нагоричане, Жаклина Јовановска, која кажа дека сите се трогнати од овој убав гест на нивниот сожител, иако ова не е првпат тој да донира во општината.

„Поделени се пакетчиња за сите ученици од прво до девето одделение во сите централни и подрачни училишта во Општина Старо Нагоричане, а тоа се вкупно 292 ученици. Многу ни е драго што е обезбеденa помош не само за учениците во помалите одделенија, како што обично бива, туку и за поголемите, кои можеби повеќе се радуваа на подароците. Се надевма дека нашата соработка ќе продолжи и во наредниот период, но и дека ќе приклучат и други донатори, бидејќи нивната помош за нас значи многу“,- изјави Јовановска.

Пакетчињата се поделени во трите централни основни училишта во селата Младо Нагоричане, Драгоманце и Старо Нагоричане, како и во подрачните училишта во планинските села каде што учат само по неколку деца. Учениците во Старо Нагоричане посетуваат настава со физичко присуство, бидејќи се малобројни и има услови наставата да се одвива во училишта.

(С.Н.)

2008 - 2021 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk