Зачленете се во нашиот клуб на читатели и најновите текстови ќе ги добивате на вашата мејл адреса
Излевањето на Крива Река и поголемите долови од обилните врнeжи што вчера попладне ја зафатија Општина Крива Паланка предизвикаа големи штети во градското подрачје и околните села. Поплавени се куќи, патишта, мостови, возила , а дел од селските населби се отсечени поради свлечишта и одрони.
Селото Т’лминци со 20 жители е отсечено поради надојдените води на Крива Река кои го прелеваат мостот, а едно семејство од поплавена куќа кај местото Толинци треба да биде евакуирано.
Во прекин е и сообраќајот на регионалниот патен правец Крива Паланка-село Луке поради свлечиште, а за сообраќај е затворен и т.н. „Осички мост“ во градот. Забранети се за користење и сите пешачки мостови на Крива Река.
Наглото зголемување на водостојот на Крива Река предизвика излевање од коритото и ги поплави и пешачките патеки и мостови, урбаната опрема и паркинг просторите во градското подрачје.
Општинскиот штаб за заштита и спасување доцна синоќа одржа вонредна седница и формирани се тимови кои се распоредени итно на сите критични локации. Уште од синоќа целокупната расположлива механизација од општинските служби и од приватни фирми се на терен, се врши испумпување вода од поплавените куќи, а екипи на ЈП „Македонија пат“ работат на расчистување на свлечиштето на патот Крива Паланка - село Луке и нормализирање на сообраќајот. На терен се и екипи на Противпожарната единица и на Дирекцијата за заштита и спасување.
Од општината информираат дека водостојот на Крива Река се намалува и ги повикува граѓаните да бидат внимателни и смирени.
Зачленете се во нашиот клуб на читатели и најновите текстови ќе ги добивате на вашата мејл адреса
