Со гребeн асфалт се поправа патот кон манастирот Карпино

Со поддршка на Општина Старо Нагоричане, патот се посипува со гребен асфалт, кој се вади од магистралниот пат Куманово-Старцин.

- Наша цел е да овозможиме полесен пристап до манастирот Карпино. Ние правиме колку што можеме, но ни треба помош и поддршка. Затоа апелирам до сите луѓе кои се од овој крај или го користат патот, пред се` превозниците, со камиони и трактори, како и планинарите и ловџиите да дојдат во што поголем број и да ни помогнат во пренесување на гребен асфалт и со работа на терен. Работата е некаде нa половина и треба уште многу за да се стигне до целта. Со полесен пристап до манастирот ќе се создадат услови за поправка на конаците и уредување на целиот комплекс, - вели Трајче Димитриевски, еден од организаторите на акцијата.

Манастирот Карпино е изграден во 14 век од зетот на српскиот цар Стефан Душан. Денешниот изглед на манастир e од 16 - 17 век. Манастирска црква e  посветена на Воведение Богородичино. Манастирот бил обновен во 19 век.

Карпино е познато по скрипторска школа од 16 век. Според податоците од Институтот за македонска книжевност, во манастирот Карпино живееле над 300 калуѓери и тој важел како црковно - духовно и културно јадро за овој регион. Оригиналните ракописи, кои сега се наоѓаат во Москва, Софија и во Белград, сведочат за препишувачката школа и за постоење на ќелијно училиште.

Сега, поради негрижа на црквата и државата, целиот комплек се наоѓа во очајна состојба. Конаците се распаднати, а до црквата тешко се доаѓа поради лошиот и непристапен пат.

(С.Н.)